टंचाई आढावा बैठक घेण्यासाठी परवानगी द्या आमदार आवताडे यांची जिल्हाधिकाऱ्यांकडे मागणी

अनंत विचार न्यूज दिनांक 25/5/2024

पंढरपूर प्रतिनिधी/
गतवर्षी पाऊसकाळ कमी झाल्यामुळे मंगळवेढा तालुक्यामध्ये भीषण दुष्काळाची परिस्थिती उद्भवली आहे जनावरांना व माणसांना पिण्याच्या पाण्यासाठी वणवण करावी लागत आहे मुबलक चारा उपलब्ध नसल्यामुळे अव्वाच्या सव्वा किमतीने मिळेल तिथून चारा आणावा लागत आहे या सगळ्या बाबींचा आढावा घेण्यासाठी पंढरपूर मंगळवेढा मतदार संघातील सर्व विभागांची टंचाई बैठक घेणे गरजेचे असून आचारसहिता असल्याकारणाने बैठक घेण्यास परवानगी द्या अशी मागणी आमदार समाधान आवताडे यांनी जिल्हाधिकारी कुमार आशीर्वाद यांच्याकडे केली आहे .

नुकतेच लोकसभा निवडणुकीचे मतदान झाले असून महाराष्ट्रातील निवडणुकांचा टप्पा संपला आहे मात्र 4 जून या मतमोजणीच्या दिवसापर्यंत देशात आचारसंहिता लागू आहे अशा परिस्थितीमध्ये अनेक निर्णय घेता येत नसून आचारसहिता असल्याने अधिकाऱ्यांसोबत समन्वय साधता येत नाही तरी टंचाई आढावा बैठक घेऊन तालुक्यातील सुरू असलेल्या, बंद असलेल्या पाणीपुरवठा योजना म्हैसाळचे पाणी,टेंभू योजनेचा आढावा,मजुरांच्या हाताला काम देणे, जनावरांच्या व नागरिकांच्या पिण्याच्या पाण्यासंदर्भात उपाययोजना करणे,जनावरांच्या चाऱ्याचा प्रश्न मार्गी लावण्यासाठी चारा डेपो किंवा चारा छावणीचे प्रस्ताव तयार करणे अशा अनेक बाबींसंदर्भात आढावा बैठक घेऊन निर्णय घेणे गरजेचे आहे.

त्यासाठी सर्व विभागांचा अधिकाऱ्यांसमवेत व गावोगावच्या पदाधिकाऱ्यांसोबत एकत्रित बैठक घेऊन आढावा घेण्यासाठी आपण परवानगी द्यावी व आपण स्वतः या बैठकीस उपस्थिती दर्शविण्याची विनंती केली असल्याचे निवेदन आमदार समाधान आवताडे यांनी जिल्हाधिकारी कुमार आशीर्वाद यांना दिले आहे.